بهرووز چەمەن‌ئارا لە ساڵی ٢٠١٤ تز دۆکتراگەی لە ژێر ناونیشان “شانامەی کوردی و نیشانەیل ئاینی و ئەدەبیێ” لە ئەنستیتۆی ئێرانناسی زانکۆی گوێتینگن نۊساس و دوکتۆراگەێ وە دەس هاوردێە. لە ساڵ ٢٠١٥ ڕێکخراوێگ وە ناو ڕێکخریای ناونەتەوەیی لێکۆڵینەوەی کۆمەڵگای کوردی (IISKS) لە شار گوێتینگن ئاڵمان دامەزرانێە و هەر لەورە وە عونوان بەرپرس ئەو ڕیکخراوە دریژە وە کار خوەی داێە. چەمەن‌ئارا دۊاێ یەک ساڵ بۊەسە ئەندام دەستەی زانستی بەش زوان و ئەدەبیات کوردی زانکۆی کوردستان. هەر لەو زانکۆە بەرپرسیاریەتیی ئەنستیتۆی کوردستانناسی (KSI) ئڕا دو ساڵ وەبان شان د. بهرووز بۊە.

د. چەمەن‌ئارا شارەزا و پسپۆڕ زوان و ئەدەبیات کوردییە و تا ئێسە چەندین پەرتووک زانستی چۊ “شانامەی کوردی (ڕۆسەم و زۆراو)” ساڵ ٢٠١٦ و “بەرەو ڕێنووسی پێوەری کوردی” ساڵ ٢٠٢٢ چاپ و بڵاو بۊە. هەر لەیوا لەی ماوە چەندین وتار چۊ “وشە‌ناسی کوردی” لە کتاوەیل زوانناسی کوردی ئاکسفۆرد و “خۆناسین و ڕۆڵ زوان لە ناو ئەدبیات گۆرانی” لیان بڵاوەو کریاس ک نیشانەی خەبات و چاڵاکییەیل زانستی د. چەمەن‌ئاران.
چەمەن‌ئارا لە ساڵ ٢٠٢٣ و لە دریژەی بزووتنەوەی ژینا لە کار زانستی خوەی لە زانکۆی کوردستان دۊر خریاسەو و ئێرنگە لە وڵات ئاڵمان جیگر بۆە.