ئێمە لە ناوەندی لێکۆڵینەوەی کوردستان – تیشک‌، بۆ بەرەوپێشچوونی زیاتری زانست و مەعریفە لەسەر کوردستان و پرسی بەربڵاوتری کورد لە ڕۆژهەڵاتی نێوەڕاستدا تێدەکۆشین. تیشک لە ساڵی ٢٠٢٢ لە شاری کۆڵن لە وڵاتی ئاڵمان دامەزراوە، ڕێکخراوێکی ناحکومی و قازانج نەویستە و پابەندی لێکۆڵینەوەی ورد و زانستییانەی بوارە سیاسی، کۆمەڵایەتی و کولتوورییەکانە.

ئاوڕدانەوە و لێکۆڵینەوە لەسەر گەشەپێدانی دێموکراسی، سەقامگیرکردنی مافی مرۆڤ، پرسی جێندەری، پرسی ژنان، مافی چارەی خۆنووسین، نابەرابەریی کۆمەڵایەتی و بارودۆخی ژینگەیی لە ئێران و کوردستان، بە هەر کام لە زمانەکانی کوردی، ئینگلیسی، ئاڵمانی و فارسی بناغەی کاری ناوەند دەبێت.

• ئامانجی ناوەندی تیشک، توێژینەوە و تاوتوێی زانستییانەی لێکۆڵینەوەی کوردی و کێشەی کورد لە ڕۆژهەڵاتی نێوەڕاستە و هەوڵ دەدات لە ڕێگەی لێکۆڵینەوەکانییەوە، تێگەیشتنێکی قووڵ و زانستییانەی پرسی کورد، مێژوو، کولتوور، زمانی کوردی و کێشەکانی ئێستا بدات بەدەستەوە.
• ئامانجی ناوەندی تیشک، ئەنجامدان و پەرەپێدانی توێژینەوەی ئاستبەرز لە بابەت لێکۆڵینەوەی کوردی و پرسە پەیوەندیدارەکانی ڕۆژهەڵاتی نێوەڕاستە. ئێمە لە ڕێگەی توێژینەوەکانمانەوە هەوڵ دەدەین بەقووڵی و بەوردی لە نەتەوەی کورد، مێژوو، کولتوور و زمانەکەی بکۆڵینەوە و، بابەتەکان بە شێوەیەکی زانستییانە شەنوکەو بکەین. ئێمە لە زانست و زانیاریی ئاکادێمیدا بەشدار دەبین و هەوڵ دەدەین تێڕوانینی بەنرخ بۆ پسپۆڕان و شارەزایانی سیاسەت، لێکۆڵەران و ڕای گشتی پێشکەش بکەین.
• بەرهەمهێنانی زانیاری و بەهێزکردنی گفتوگۆ بۆ لێک‌تێگەیشتن لە ئاستی نێونەتەوەییدا، گرنگییەکی تایبەتی بۆ ئێمە دەبێت. ناوەندی تیشک هەوڵ دەدات وەک سەکۆیەک بۆ ئاڵوگۆڕی بۆچوون، ڕوانگە و زانیاریی پەیوەندیدار بە لێکۆڵینەوەی کوردی و کۆمەڵێک پرسی ڕۆژهەڵاتی نێوەڕاست چالاک بێت. ئامانجی ئێمە ئاسانکاریی گفتوگۆی شوێندانەر لەنێوان لێکۆڵەران، توێژەران، چالاکان و پسپۆڕانی سیاسەت لە ڕێگەی کۆنفڕانس، سمینار، کارگرووپ و بڵاوکراوەکانەوە دەبێت.
• هاوکاری بە مانای بەرەوپێشبردنی زانست و چارەسەریی کێشە ئاڵۆز و سەرەکییەکانە. ناوەندی تیشک هەوڵ دەدات هاوکاریی ئاکادێمی لە ڕێگەی کاری هاوبەش لەگەڵ زانکۆکان، دامەزراوە توێژینەوەیی‌یەکان و، ئەو ڕێکخراوانە بکات کە لە بواری لێکۆڵینەوەی کوردی و کاروباری ڕۆژهەڵاتی نێوەڕاستدا چالاکن. لە ڕێگەی پەرەپێدانی هاوکاریی نێوان زانستەکان و هاوبەشکردنی سەرچاوەکانەوە، ئامانجمان بەرزکردنەوەی ئاست، کوالێتی(چۆنایەتی) و کاریگەریی توێژینەوەکان لەم بوارانەدایە.
• بە لەبەرچاوگرتنی ژمارەی بەرچاوی پەنابەرانی کورد، ئەم ناوەندە هەوڵ بۆ لێک‌نزیکردنەوە و بردنەسەری توانایی ئاکادێمیی ئەو پەنابەرانە دەدات و هەروەها خزمەتگوزاریی پشتیوانی، سەرچاوە و بەرنامە پێشکەش دەکات و بۆ تێکەڵبوون و نزیکبوونیان لەگەڵ کۆمەڵگەی نێوخۆیی، ئاڵوگۆڕی کولتووری، لێک‌تێگەیشتن و داکۆکی لە مافەکانیان و بەشداربوون لە لایەنە جیاوازەکانی کۆمەڵگادا ئاسانکارییان بۆ دەکات. ئامانجی ناوەندەکە پەروەردەکردنی ژینگەیەکی لەبار و ئەرێنییە کە هاندەر و پشتیوانی گفتوگۆ، هاوکاری و ڕێزگرتنی بەرانبەر لەنێوان کوردانی تاراوگە(دیاسپۆرا) و کۆمەڵگە خانەخوێیەکان دەبێ.

ناوەندی تیشک لە ڕێگەی ئەم ئامانجانەوە هەوڵ دەدات لە پەرەپێدانی لێکۆڵینەوەی کوردی وەک دیسیپلینێکی ئاکادێمیی دانپێدانراو بەشدار بێ و، لە هەمان کاتدا پەرە بە تێگەیشتنێکی قووڵتر و وردتر لە ناوچەی ڕۆژهەڵاتی نێوەڕاست بدات.

دامەزراندنی گۆڤاری تیشک پاشخانێکی هزری هەیە و لە ساڵی 1990ەوە لە لایەن ڕووناکبیرانی کوردەوە لە پانتاییی بڵاوکراوەی کوردیدا چالاک بووە.

گۆڤاری تیشک بە ٦٨ ژمارەی چاپکراوەوە وەک پلاتفۆڕمێکی پێشەنگ پابەندی بنەما ئاکادێمی و زانستییەکان بووە. بابەتی تیۆری، شیکاری، باس و چاوپێکەوتنی ڕاستەوخۆ، وەرگێڕانی شوێندانەر، ڕانان و شیکردنەوەی کتێبی ڕۆشنگەرانەی پێشکەش کردووە. ئەم گۆڤارە بەقووڵی و بەوردی، بنج و بناوانی پرسە گەرموگوڕەکانی کورد، کوردستان و کاروباری ڕۆژهەڵاتی نێوەڕاستی هێناوەتە بەرباس. هاوکات ڕوانگەیەکی زانستییانەی بۆ ئەو پرسانە هێناوەتە گۆڕێ کە پەیوەندییەکی ڕاستەوخۆیان بە کوردستانەوە هەبووە. ڕووناکی بەخشیوەتە کاری مەعریفی و ئاکادێمی، بابەتە گرینگ و هەستیارەکانی بەجوانی شەنوکەو کردووە و، بۆ لێکدانەوە و شیکاریی کاروباری ڕۆژهەڵاتی نێوەڕاست یارمەتیدەر بووە.

خۆمان بە خۆشحاڵ دەزانین کە لە چەند مانگی داهاتوودا بە فۆڕمێکی نوێوە گۆڤاری تیشک ڕادەگەیەنین. ئەم گۆڤارە سەرچاوەیەکی بەنرخە بۆ ئاگاداربوون و پێشەنگبوون لە بواری لێکۆڵینەوەی کوردی و کاروباری ڕۆژهەڵاتی نێوەڕاستدا.

گۆڤاری تیشک کۆمەڵێک وتار، چاوپێکەوتن، شیکاری و لێکدانەوەی لێکۆڵەران، توێژەران و پسپۆڕانی دیار و بەناوبانگ لەم بوارەدا بڵاو دەکاتەوە. کۆمەڵێک وتاری جۆراوجۆری پەیوەندیدار بە کوردستان کە تەوەری سیاسەت، کولتوور، مێژوو، زمان، ئەدەب، و … هتد لەخۆ دەگرێت.