سەروەری، دەوڵەت، شارۆمەندبوون، بێدەوڵەتی و کورد
لەم پادکەستەدا ئێوە گوێگری وتاری “سەروەری، دەوڵەت، شارومەندبوون، بێدەوڵەتی و کورد: خوێندنەوەیەکی سەرەتایی” لە نووسینی د. خالید خەیاتی دەبن کە لە ژمارەی ٧١ی گۆڤاری تیشک بڵاو کراوەتەوە و لە لایەن خاتوو شەهلا دەباغی خوێنراوەتەوە. مۆنتاژ و ئامادەکردن: ژیلا ڕەحمانی، نەجات ڕەحمانی و هیوا مەجیدپوور سەرچاوەدان: خەیاتی، خالید (٢٠٢٥):سەروەری، دەوڵەت، شارومەندبوون، بێدەوڵەتی و کورد: خوێندنەوەیەکی سەرەتایی . گۆڤاری تیشک، ٢٦، ٧١، ل. ٢٩–١٠. https://doi.org/10.69939/TISHK0071 لە نێوەڕۆکی وتارەکە: لەوانەیە بە پێی هێندێک بۆچوون، دیسانیش مۆدێلی فێدڕاڵی وەکوو باشترین ئالترناتیڤ بۆ دابەشکردنی سەروەری و هەروەها دەستەبەرکردنی دیمۆکڕاسی و دەوڵەتی یاسا بەم پێیەش وەکوو مۆدێلێک بۆ چارەسەری پرسی شوناس لە وڵاتانی فرەنەتەوە ئاماژەی پێ بکرێت. لەم ڕوانگەیەوە، لە فەزا گشتییەکاندا زۆر جار وڵاتگەلی وەکوو سویس و بێلژیک وەکوو نموونەی سەرکەوتووی دیمۆکڕاسی باسی لێ دەکرێت کە هەم مەجالی دابەشکردنی دەستەڵاتی سیاسی و دەستەبەرکردنی دەوڵەتی یاسا و هم ئیمکانی بنیاتنانی سیستەمێکی کانتۆنی یان فێدڕالی بۆ چارەسەری دۆخی فرەنەتەوەیی و فرەزمانی خۆیان پێشکەش دەکەن. چاوەڕوانیی دووپاتبوونەوەی ئەزموونی سویس و بێلژیک لە کۆنتێکستی سیاسیی ڕۆژهەڵاتی نێوەڕاست و بە تایبەت لە وڵاتگەلی وەکوو ئێران، تورکیا، سووریا و عێڕاق، بە هۆکاری ئەوەی کە ئەم وڵاتانە هەتا ئێستاش قۆناغی پەیمانی کۆمەڵایەتییان دەستەبەر نەکردوە، چاوەڕوانییەکی نامێژووییە. لە هەمان کاتدا زۆر گرینگە کە لە ڕوانگەی تاکی نەتەوەی ژێردەستەوە بە گومان سەیری دیمۆکڕاسی بکرێت. کاتاڵانەکان و باسکەکان لە سپانیا، سەرەڕای ئەو پێگە بەهێزە ئابوورییەی کە هەیانە، هەتا ئیستاش ڕێگایان پێ نەدراوە کە لە پێناو گەیشتن بە سەروەریی سیاسی، وەکوو کێلسێن دەڵێت بە ڕێگای پەنابردن بۆ دەنگدانی گشتی تەعبیر لە ئیڕادەی خۆیان بکەن.
ناوەندی لێکۆڵینەوەی کوردستان – تیشک لە تۆڕەکۆمەڵایەتییەکان:
