ئێران وەردەمو گۆڕانكارییەكانە و ئێمەی كورد ڕۆژهەلاتو كوردستانیەنە

دماو دابەشكریای جوغڕافیاو كوردستانی بەهۆو ئەنجامەكاو شەڕە نگریسە جیهانییەكا بە ڕێككەوتەی زلهێزەكا پەیمانە جەهانییەكانە، وینمێ كورد ڕێك وەختێوەنە وێش نمانان و تەعبیرش جە ئیرادەو وێش كەردەن كە بەریەككەوتەی بەڕژەوەندی زلهێزەكا و ململانە مەنتەقەیی و جەهانییەكا كارێوش كەردەبۆ كە یۆ جە وڵاتانی زاڵەسەرو كوردستانی، تووشو جۆرێو جە پشێوەی، تێكشیەی و بۆشایی دەسەڵاتی ناوەندی ئامابۆ و هامكات بەرژەوەندییە نەتەوەییەكێ كوردی چەنی بەرژەوەندیو زلهێزەكا هامتەریبێ بیێبا. دوورش پەی نەلمێ ئەزموونو هەرێمو كوردستانی و ڕۆژاوای دوێ نموونێ زیندێ نەتیجێو ئی بەریەككەوتەی و ئا بۆشایی دەسەڵاتیە بیەن كە دەسەڵاتی بەعسیزمو سەددامی و ئەسەدی تووشش ئامەینێ.

ئانەیە مشۆ قەدەرو كوردی هەر ئینەنە و غەیرو ئانەیچە جارێو هیچ دوورنمایێو نیا هەتا عەقڵییەتی دۆگما و دیكتاتۆری ڕۆژهەڵاتی ناوەڕاستەنە واڕیۆ پەی عەقڵییەتو دیمۆكراسی و پلۆرالیزمی و مافی چارەو وێنویستەی و قبووڵو ئەویتەری و دەستەبەربیەی مافە نەتەوەییەكاو ئینسانو كوردی. ئجۆ ئیسە، ئا وەخت و وادەنە كە كوردو ڕۆژهەڵاتی ساڵەهان چەمەڕوانیش پەی كەرۆ. پەوكەی میاونۆما پی قەناعەتە ئیستەرەم كورد مشیۆ ئیجاریچە بە وریایی و ژیری زیاتەرەو پا ئاراستەرە گنۆ سیاستەكەردەی.

كورد ڕۆژهەڵاتو كوردستانیەنە بە درێژایی تەمەنو كۆمارو ئیسلامی، هەر جە یەكەم ڕوەكاوە بە دژایەتیكەردەی سیاسەتو داگیركەردەی باڵوێزخانەو ئەمریكای و بەشدارینەكەردەیش ڕێفراندۆمو ئەرێ واتەی بە كۆماری ئیسلامی تا ڕووداوەكاو ئی دماییە، یۆ جە ئەكتەرە هەرە گرنگەكاو گۆڕەپانو خەبات بە دژو دەسەڵاتی ناوەندی ئێرانی و كۆو پڕۆژە و پلان و سیاسەتە ناوخۆیی و دەرەكییەكاش بیەن و تاوانش جە قۆناغە مێژووییەكانە گۆمەی مەنگەو بێدەنگی شەقامی سیاسی ئێرانی شڵەقنۆ و گێرە ڕووبەڕوو فرەتەرین سەركوت و نەهامەتی و تێچوویچ بیەنەو.

بە دڵنیاییەو دۆخو ئیسەو كۆماری ئیسلامی، دمابەدماو شۆڕشو ژینای و ڕووداوەكاو حەوتو ئۆكتۆبری و پڕای لینكە مەنتەقەییەكاش و شەڕو دوانزەڕوەی و تا ئیسەیچشە، هەم جە ڕووە ناوخۆیی و مەنتەقەیی و جیهانییەكاوە هەڕۆڵ و تەپیانەرە و هەمیچ دۆخەش جە بواری سەربازی، ئابووری فەرهەنگی و كۆمەڵایەتییەو شڕۆڵ و هۆرتەكیان و هەمیچ مۆتەكەو شەڕی دووبارەو ئەمریكای و ئیسرائیلی و هەرپاسە ناڕەزایەتییە جددییە خەڵكییە سەرانسەرییەكا، هەر ڕۆ زیاتەر ڕوو بە داڕمانی یەكجاریش بەرۆ و هیچ شانسێوو مەنەیش پەی ناستەنەو.

 ڕەنگا ڕووداوەكێ وێنۆزۆئێلا، سووریەی و هەمتەر ئاماژێ، سیگناڵێ با پەی ئانەیە ڕۆژاوا بە شێوەی كۆنكرێتی جە فكرو بەدیلی و واڕای(واڕیای)و گشتییەتو كۆمارو ئیسلامیەنە نەبۆ و گێرە بە یاوای بە بڕە ئەهدافێویش پێسەو كوشتەی یا گرتەی سەرانو دەسەڵاتی و زەعیفكەردەیش و دڵنیابیەیش جە پرسی ناوكی و موووشەكی بالیستی و هەرێمی ئەمنو ئیسرائیلی، وەرش دۆ و ئینەیچە وێش خرابتەرینو حاڵەتەكان. جە ئاستو ساحەی سیاسی ئێرانیچەنە ئانەیە مشۆ جە نەبیەی ئۆپۆزیسیۆنێوی جددی و كارای ناوەندگەرایەنە، كۆمەڵە پاشماوەكێ ڕژێمو پاشایەتی یام كەسانی پەراوێزوزیاو حاكمیەتی ڕوەی وەشە نیشانە دا بە دنیای و دەسگێرا ملوو هێزی سەربازی وڵاتیەرە و نازا بۆشایی دەسەڵاتی وەش بۆ. ئەگەرچی ئینێ تەنیا ئەگەرێنێ و ئەگەرێتەرێچ كریۆ وینیا.

هەرچی بۆ كورد ئیجارە بە ئەوەوانای جددی دۆخەكەی و وەرچەمگرتەی كۆو سێناریۆكا، مشیۆ هەنووكە ئامانج و دوورنماش بەئاراستەو ئەمرەی واقێعەو وێش بۆ سەرو ئەرزو ڕۆژهەڵاتو كوردستانیەو و مشیۆ بە دەستەبەركەردەی خاكی و جوغڕافیای، بە هێزی سەروازی و جەماوەری و دیپلۆماسی ئیرادەو وێش چەسپنۆ. پەی ئینەیچە مشیۆ گێڵۆ پەی خاڵە هامبەشەكاو بەرژەوەندی وێش چەنی بەرژەوەندییەكاو ڕۆژاوای و ئیسرائیلی و بە هیچ كلووجێو نەكۆشیۆ گنۆنە جۆرێو ڕقەبەری و دژایەتی چەنیشا.

كورد مشیۆ بزانۆ بەبێ مسۆگەركەردەی فاكتەرو خاك(جوغڕافیا) و هێزی، هامڕاستا چەنی بەرژەوەندیەكاو ڕۆژاوای، نەك هەر ترامپ و ڕۆژاوا و ئیسرائیل، گێرە ئێران و ناوچەكەیچەنە كەس حەسێبش پەی نمەكەرۆ.

چێش چینەیە خاستەر؟ ئیسە كە تەمام هەلومەرجەكە لەبارا، با كورد هیچ درەنگ نەكەرۆ و بە یەكڕیزی و كاری هامبەشو لایەنە كوردستانیەكا(ناوەندو دیالۆگی)، كار و پڕۆژەی هامبەش چەنی نەتەوە چێردەسەكاو ئێرانی و هامكاری چەنی هێزە دیمۆكرات و پێشكەوتنخوازە سەرتاسەریەكا و هەرپاسە ئێستەی لۆبی و شەڕو دیپلۆماسی، گردو هاز و هێزیش وزۆ گەڕ.

   دماجار یادما نەشۆ كاركەردەی پەی ئا ئامانجیە هەنووكە جە نانەو شەوێچ پەی ئێمەی كوردی واجبتەرا چوونكەی، ئێران ڕەنگا جیاوازتەر جە یاگاتەریا و ڕەوتو ڕووداوەكایچ بەجۆرێو خێران كە هەر سات ئەگەرو ئانەیشە هەن نگا و گەمەو ڕۆژاوای و باقی ئەكتەرەكا واڕۆ و پەی هەمیشەی ئی هەلە تارێخیێ جە ئێمەی كوردی گێریۆ.

بیروڕا

بە شێوەی ئانلاین لە لایەن ناوەندی لێکۆڵینەوەی کوردستان-تیشک لە بلاگی ژیانەوە بڵاو کراوەتەوە: ٢٠ی بەفرەنباری ٢٧٢٥ی کوردی

ڕۆژهەڵات، هەرمان(٢٠٢٥): ئێران وەردەمو گۆڕانكارییەكانە و ئێمەی كورد ڕۆژهەلاتو كوردستانیەنە. بلاگی ژیانەوە؛ ناوەندی لێکۆڵینەوەی کوردستان – تیشک.