ڕێکەوت: ١٢-٠١-٢٠٢٤ ، کاتژمێر٢:٣٠ی پاش نیوەڕۆ، ، Am Hof 1, 53113 Bonn | Hörsaal I

ناوەندی لێکۆڵینەوەی کوردستان- تیشک سەمپۆزیۆمێک لەژێر ناوی “پڕۆسەی گۆڕانکارییە سیاسییەکان لە ئێران-دا” ڕادەگەیەنێت. ئەم کۆنفڕانسە زانستییە بڕیارە ڕۆژی هەینی ٢٢ی بەفرانباری ٢٧٢٣ی کوردی، لە وڵاتی ئاڵمان و لە زانکۆی بۆن، هۆڵی کۆبوونەوەکانی ١، Am Hof 1, 53113 Bonn | Hörsaal I بەڕێوە بچێت.
لە سەمپۆزیۆمەکەماندا کۆمەڵێک مامۆستا و پسپۆڕی ئاکادێمی بەشدار دەبن، کە توێژەر و لێکۆڵەری بوارە جۆراوجۆرەکانی وەک کۆمەڵناسی، ڕۆژهەڵاتناسی، لێکۆڵینەوەی ئیسلامی، زانستی سیاسی و یاسای نێودەوڵەتین. ئامانجی ئەو بەشداربووانە بەرەوپێشچوونی دیالۆگ و گفتوگۆی نێوان زانستەکانە سەبارەت بە پڕۆسەی گۆڕانکارییە سیاسییەکان لە ئێران-دا.

لە سەمپۆزیۆمەکەدا ئەم پانێلانەی خوارەوە بەڕێوە دەچن:

ئاسۆ و دوورەدیمەنی سیاسی لە ئێراندا، دوای کوشتنی حکومەتیی ژینا ئەمینی لە خەرمانانی ٢٧٢٢ی کوردیدا کۆمەڵێک گۆڕانکاریی بەرچاوی بەدوای خۆیدا هێنا. دەستپێکردنی خۆپێشاندان و ناڕەزایەتییەکان لە کوردستان و دواتر پەرەئەستاندنیان بۆ هەموو ئێران، وەرچەرخانێکی گرینگ لە مێژووی هاوچەرخی کوردستان و ئێران بوو. ئەم دەستپێشخەرییە بە ئامانجی لێکدانەوە و تاوتوێی ئەم گۆڕانکارییانە بەڕێوە دەچێ کە ئاخۆ پەراوێز (هەرێمە پەراوێزخراوەکان) بۆ نموونە کوردستان، بوونەتە ناوەندی گۆڕانکارییە سیاسییەکانی ئێران یان نا!

سەرەڕای ئەوەی کە بزووتنەوە کۆمەڵایەتییەکان لەنێو کۆمەڵگەی مەدەنیی ئێراندا داکۆکی لە بەها گشتگیر و جیهانییەکانی وەک دێمۆکراسی، مافەکانی مرۆڤ و ژنان دەکەن، هاوکات کۆماری ئیسلامیی ئێران(IRI) بە شێوەیەکی بەربڵاو پەرە بە ئیسلامی سیاسی بەتایبەتی لە ئێران و ڕۆژهەڵاتی نێوەڕاست دەدات. ئەم سەمپۆزیۆمە پاش خوێندنەوەیەکی کورتی مێژووی ئیسلامی سیاسی، وەکوو ئایدۆلۆژییەکی سیاسی لە ئێران و پەرەگرتنی لە ناوچەکەدا، باس لە پەیوەندیی ئاڵۆزی ئیسلامی سیاسی لە ئێران و بزووتنەوە تیرۆریستییەکانی وەک حەماس دەکات. لەم گفتوگۆیەدا، توانایی و پوتانسییەلی بزووتنەوەی دێمۆکراسیخوازی لە ئێران بۆ کەمکردنەوەی تیرۆر لە ناوچەکە و پەرەپێدانی ئاشتی لە ڕۆژهەڵاتی نێوەڕاست زیاتر قسەی لەسەر دەکرێت.