ئەی ئەو مەخلوقە بچووکەی کە لەناو پۆشاکێکی پیرۆزدا خۆت حەشار داوە و وا دەزانیت کلیلی بەهەشت و دۆزەخت لە گیرفاندایە، چەند جێگەی پێکەنین و گریانە کە مێروویەکی سەر ئەم گۆی زەوییە، بە ناوی بەدیهێنەری گەردوونەوە بڕیار لەسەر (پیسی و خاوێن)ی مرۆڤەکانی تر بدات. تۆ دەڵێیت ئێزیدییەکان گڵاون؟ وەرە با بە زمانی عەقڵ پێت بڵێم کە هیچ پیسییەک لەوە قێزەونتر نییە کە مێشکت پڕ بێت لە خەیاڵی خوێن ڕشتن و زمانت وەک
چەقۆیەکی ژەنگاوی بێت بۆ بڕینی گەرووی دراوسێکانت. پیسی لای خودا، نەبوونی دەستنوێژ نییە، بەڵکو ئەو ڕقە ڕەشەیە کە وای لێکردوویت نەتوانیت شکۆی مرۆڤ لەناو چاوی کەسێکی جیاوازدا ببینیت.

بەڕاستی لۆجیکی جەلادەکان زۆر سەیرە، تۆ دەڵێیت ئەگەر هەلت بۆ هەڵکەوێت ناهێڵیت یەک چرکە بژین؟ ئایا خوداکەی تۆ ئەوەندە بێدەسەڵاتە کە پێویستی بە ناخ ڕەشێکی تووڕەی وەک تۆ بێت تاوەکو زەوییەکەی بۆ پاک بکاتەوە؟ ئەگەر خودا ویستبای هەمووان وەک تۆ بن، بێگومان دەیکردن، بەڵام وا دیارە ئەو چێژ لە فرەیی و جیاوازی وەردەگرێت و تەنها تۆیت کە لەناو ئەو هەموو جوانییەدا هەر ڕەنگی سووری خوێن دەبینیت. ئەمە نەک هەر لادانە لە ئایین، بەڵکو سووکایەتییەکی گەورەیە بەو خودایەی کە تۆ ئیدیعای نوێنەرایەتیکردنی دەکەیت.

ئەی تاریكپەرستی سەردەم، تۆ دەڵێیت ڕۆحێکە و با فیدای دین بێت؟ وەرە با ڕاستگۆ بین، تۆ تەنها ئاشقی مەرگی ئەوانی تریت، نەک مەرگی خۆت. جەلادەکان هەمیشە لەسەر میحراب و سەکۆ بەرزەکان دەوەستن و مژدەی مردن بە گەنجە ساویلکەکان دەدەن، لە کاتێکدا خۆیان وەک مشک لەناو کونی بەرژەوەندییەکانیاندا حەشار داوە. تۆ باس لە مەلای گەورە و مودەڕیس و موفتیزادە مەکە، چونکە ناوی ئەوان بۆنی مەعریفە و مرۆڤدۆستی لێ دەهات، بەڵام گوتاری تۆ بۆنی ئەو تەرمانە دەدات کە لە سەردەمی بەربەرییەتدا جێ مابوون. تۆ نەک هەر درێژکراوەی ئەوان نیت، بەڵکو ئەو دێوەزمە تاریكەیت کە دەتەوێت مێژووی ڕۆشنبیریی ئەم میللەتە تیرۆر بکەیت.

سەیری وڵاتانی تر بکە، لە فلیپینەوە بۆ مالیزیا هەتا میسر و مەغریب، مرۆڤەکان فێربوون چۆن بە جیاوازییەکانیانەوە پێکەوە نان بخۆن، کەچی تۆ لێرە لەناو ئەم کۆمەڵگە بریندار و دڵشکاوەی ئێمەدا، خەریکی چاندنی گەرای داعشی و پەتای نکوڵیکردنیت. ئەمە ئەو کاتەیە کە دەبێت عەقڵ ڕابپەڕێت و پێت بڵێت: بێدەنگ بە! چونکە خودا پێویستی بە جەلاد نییە و ئایینیش مژدەیەکە بۆ ژیان، نەک جاڕنامەیەک بۆ سڕینەوە. تۆ تەنها بەکارهێنراوێکی نەفامی مێژوویت کە دەتەوێت کوردستانیش بکەیتە ئەو بیابانە بێ ڕۆحەی کە تێیدا تەنها دەنگی شمشێر و ناڵەی قوربانییەکان دەبیسترێت.

لە کۆتاییدا بڕۆ و لە ناو ئاوێنەی ویژدانتدا سەیری خۆت بکە، ئەگەر شتێک لە مرۆڤایەتیت تێدا مابێت، شەرم لەو وشانە دەکەیت کە بەرانبەر بە گەلێکی چەوساوەی وەک برا ئێزیدییەکانمان وتووتە. ئەوان پارچەیەکی ڕەسەنی ئەم خاک و ئاوەن، بەڵام تۆ گەراکەیەکی نامۆی ناو ئەم جەستەیەیت کە دەتەوێت لە ناوەوە بیڕزێنیت. دڵنیات دەکەمەوە کە ئەگەر بەخۆتدا نەچیتەوە و پەشیمان نەبیتەوە ئەوا نەوەکانیشت شەرم لەناوهێنانت دەکەن! کوردی موسڵمانیش بە کەسێکی لادەر و بەکرێگیراوی دوژمنانت دادەنێت! چونکە تۆ میحرابت کردە سەکۆیەک بۆ بانگەشەی جینۆسایدکردنی بەشێک لە نەتەوەکەی خۆت. دڵنیاشت دەکەمەوە کە جیهان بەبێ ڕقی تۆ زۆر جوانترە و خوداش زۆر لەوە میهرەبانترە کە جەلادێکی وەک تۆی بۆ پاراستنی دینەکەی ناردبێت.

تێبینی: ئەمە وەڵامێکە بۆ وتاری مەلا (ڕامین ساڵح زادە- لە شاری بانە) کە لە خوتبەدا وتی:« یەزیدییەکان ئێمە ئێوە بە کافر دەزانین! ئێزیدییەکان ئێمە ئێوە بە گڵاو دەزانین! ئێزیدییەکان ئێمە ئێوە بە داوێن پیس دەزانین! بەوەڵڵاهی بچوکترین هەلمان بۆ هەڵکەوێ نایەڵین یەک چرکە لەسەر ئەم زەوییەدا بژین! ئەوە دینەکەمانە نە لە کەسی دەشارینەوە، نەخۆشمان دەشارینەوە، نە لە کەس دەترسین نە ترسیش لەناو دڵمانا هەیە! ئێمە یەک مردنمان لەسەرە با ئەو مردنە لە پێناو خوادا بێت! ئێمە یەکجار ئەمرین، ڕۆحێکە خوای تەعالا یەکجار پێی داوین و یەکجار لێمان دەسەنێت، با هەردووکی بە قوربانی دینەکەی خوای پەروەردگار بێت! با هەردووکی بە قوربانی فەرموودەیەکی پێغەمبەر بێت»

بیروڕا

بە شێوەی ئانلاین لە لایەن ناوەندی لێکۆڵینەوەی کوردستان-تیشک لە بلاگی ژیانەوە بڵاو کراوەتەوە: ٢٠ی گەلاوێژی ٢٧٢٦ی کوردی

محەممەد، کامەران(٢٠٢٦): فیقهی کەلاکخۆرەکان (کاتێک میحراب دەبێتە قەسابخانە و مەلا دەبێتە جەللاد). بلاگی ژیانەوە؛ ناوەندی لێکۆڵینەوەی کوردستان – تیشک.